ഉണര്‍ച്ച

എത്രാമത്തെ കടിയിലാണുണര്‍ന്നതെന്നറിയില്ല

ചുറ്റിപ്പറക്കുന്ന ധാര്‍ഷ്ട്യത്തിന്റെ

മൂളലിനെയുന്നം വച്ച്

കൈയ്യൊന്നു വീശി

ആദ്യം.

ചുറ്റിപ്പറന്ന ശബ്ദം ഞെരിഞ്ഞമര്‍ന്നു.

ഉന്നമിപ്പോഴും പിഴച്ചിട്ടില്ല,

പാതിയുറക്കത്തിലും.

വീണ്ടും പക്ഷേയുറക്കത്തിലേക്കു മടങ്ങമെന്നുകരുതി

തിരിഞ്ഞൊന്നു കിടന്നെങ്കിലും

അവിടെയുന്നം പിഴച്ചു.

എന്നും വെളുപ്പിനെ

ഉറക്കം മുറിക്കാന്‍ എത്താറുള്ള കൊതുക്

ഇതു തന്നെയാണോ?

എന്നും ആ മൂളലിന്

ഇതേ താളം തന്നെ.

എന്നും 

കൊതുകുകടി കൊള്ളുന്നതിന്‍മുന്പ്

സഞ്ചരിച്ച സ്വപ്നം ഒന്നു തന്നെയാണോ?

ആര്‍ക്കറിയാം

സ്വപ്നങ്ങളെയും മൂളക്കങ്ങളെയും 

വ്യാഖ്യാനിക്കാനുള്ള ഭാഷ.